პოტერების ოჯახი

 ბატონ და ქალბატონ პოტერებს, სოფელ ჰამბლეტონის მახლობლად რომ ცხოვრობენ, მეტად უჩვეულო სახლ-კარი ჰქონდათ. ორსართულიან თეთრ სახლს ცალ მხარეს ზურმუხტისფერი ფოთლებითა და პატარა წითელი ვარდებით დამშვენებული მცენარე ასდევდა. სახლი წითელი კრამიტით იყო გადახურული და ზედ ორი საკვამური ედგა. სახურავზე ცოცხები მიემაგრებინათ. ლამაზ და უჩვეულო შენობას გარშემო მაღალი, ცოცხალი ღობე ერტყა, რომელიც მთლიანად ფარავდა მას უცხო თვალისგან. მოზრდილი ეზოს მარცხენა მხარეს ნაირფერი ყვავილების ბაღი გაეშენებინათ, ხოლო მარჯვნივ ხეხილისა. ხეხილის ბაღში ერთ-ერთ ყველაზე მაღალ და ყველაზე ბებერ ნუშზე საქანელა იყო ჩამოკიდებული, რომელსაც საბურავი ჰქონდა შებმული დასაჯდომად. უკანა ეზოში პატარა ფირუზისფრად მოციალე გუბურაში ოქროსფერი და წითელი თევზები ნაზად დაცურავდნენ. გუბურას გარშემო რამდენიმე გრძელი სკამი ერტყა და ისეთ შთაბეჭდილებას ქმნიდა თითქოს რომელიმე პატარა სკვერში ყოფილიყავი. ამ პატარა გუბურის მხარეს ეზოს ტბა ესაზღვრებოდა და ეს ნაწილი შემოუღობავი იყო, რის გამოც სახლის მკვიდრთ შესანიშნავი ხედი ეშლებოდათ თვალწინ. სახლს პატარა ფანჯრები ჰქონდა, ხოლო მთავარი შემოსასვლელი კარი ფართო, ხისგან გაკეთებული იყო და ზედ ფანჯრებივით კვადრატული ნახევრადგამტარი მინა ჰქონდა. კარის თავზე კი ხის აბრა მიეკრათ, რომელზეც ლამაზად ამოეჭრათ სიტყვა “ცოცხი”.
“ცოცხის” მკვიდრნი ისევე განსხვავდებოდნენ სხვებისგან, როგორც მათი კარ-მიდამო სხვა ჩვეულებრბვი სახლებისგან. ამ სახლში მცოვრები ადამიანები ჯადოქრები იყვნენ. ოჯახის უფროსი ჰარი, მისი მეუღლე ჯინი და შვილები ჯეიმსი, ალბუსი და ლილი პოტერები ჯადოქრული საზოგადოების სრულფასოვანი წევრები იყვნენ და მაგლებისგან ანუ არაჯადოქრული მოსახლეობისგან მალულად უწევდათ ცხოვრება.
ჰარი პოტერი ჯადოქრულ სამყაროში სახელგანთქმული პიროვნებაა. იგი შეიძლება ჩაითვალოს მთელი ჯადოქრული სამყაროს მხსნელად იმიტომ, რომ მან 19 წლის წინ დაამარცხა ყველა დროის ყველაზე ბოროტი და შეუბრალებელი ჯადოქარი, რომელიც თავის თავს უწოდებდა ლორდ ვოლდემორს. ლორდმა ვოლდემორმა ჰარის ჯერ კიდევ ერთი წლის ასაკში დაუხოცა მშობლები და მის მოკვლასაც შეეცადა მაგრამ იმედები მწარედ გაუცრუვდა. ჰარი პოტერი დღემდე ერთადერთი ჯადოქარია, რომელმაც შეძლო მომაკვდინებელ წყევლას ხელიდან დასხლტომოდა და შელოცვა მოწინააგმდეგისთვის მიებრუნებინა ყოველგვარი ჯადოქრობის გარეშე მხოლოდ ერთი წლის ასაკში. მეორედ მან იგივე მოახერხა 17 წლისამ ოღონდ იმ განსხვავებით, რომ ახლა მანაც გამოიყენა მაგია და საბოლოოდ გაანადგურა ვოლდემორი. მთელი ჯადოქრული სამყაროსათვის ჰარი პოტერი არის “ბიჭი, რომელიც გადარჩა და იხსნა მათი სიცოცხლე”...